Aumingja maðurinn!

Þetta hefði nú hún amma mín heitin kallað fígúruskap. Að eyða á annan milljarð króna undir rassgatið á sér út í geiminn. Það liggur við að maður haldi að jörðin væri betur komin ef svona ferðalangar kæmu ekki til baka úr sínum fígúruferðum. Er virkilega ekkert betra sem maðurinn getur fundið upp til þess að eyða aurunum sínum. En auðvitað á maður ekkert með að vandlætast þetta. Ætli maður segi ekki bara eins og hún amma mín heitin hefði sagt áður en hún tæki málið endanlega af dagskrá: "Aumingja maðurinn!!!"

Geimferðalangur kominn til alþjóðlegu geimstöðvarinnar

Athugasemdir

[HP Foss, 9.4.2007 kl. 21:55]

Já, ömmurnar vita/ vissu sínu viti. Mín amma sagði einhverntíman þegar við vorum að keyra á fögrum sumardegi , til að líta á æskustöðvar hennar í Fljótshvefinu, og keyrðum eftir eystri hluta Skaftáreldahraunsins, Brunahrauni: Ég held að þeir ættu að setja þennan skóg í hraunið. Það er þá ekki spandering á landinu á meðan.

Ömmur eru bestu konur í heimi.Segja yfirleitt bara það sem þarf að segja.

[Geiri (IP-tala skráð) 10.4.2007 kl. 03:13]

Tja mér finnst það skárra að fólk kaupi sér miða út í geiminn heldur en að skattgreiðendur séu látnir borga slíkt fyrir aðra.

Svo er þetta auðvitað bara fyrsta skrefið að senda milljarðamæringa. Það er stefnt að því að þróa geimferðalög þannig að millistéttarfólk muni eiga efni á því eftir nokkra áratugi. 

[Sigurður G. Tómasson, 10.4.2007 kl. 21:16]

Geiri misskilur mig dálítið. Ég er ekkert að agnúast út í geimferðir. Það kann vel að vera að nauðsyn sé á þeim. Vegna vísinda. Og þá er ekkert athugavert við að skattar séu notaðir til þess að borga brúsann. En Simonyi eyðir ekki peningunum í vísindaskyni, heldur til þess að fara sjálfur út í geiminn. Og mér finnst það hégómi  og fígúruháttur, þótt hann eigi peningana sjálfur.

En fyrst verið er að tala um skattpeninga og Rússar nota þessa peninga auðvitað til þess að kosta geimferðaáætlun sína, þá má spyrja: Væri þiem ekki nær að nota peninga til þess að lagfæra umhverfisglæpi Sovétstjórnarinnar, til dæmis þurrkin Aralvatnsins?

Og gæti Simonyi ekki til dæmis notað  gróða sinn til þess að hjálpa S.Þ. og Rotaryhreyfingunni að útrýma lömunarveiki en til þess vantar nú herslumuninn, eða skaffa nokkrum hundurðum þúsunda barna aðgang að hreinu vatni?

Það er þess vegna sem ég segi upp á Skaftfellsku: "Aumingja maðurinn!!!"

[Eysteinn Ingólfsson, 12.4.2007 kl. 19:46]

Já eða laga vegi eins og þennan.

Annars finnst mér þetta álíka mikið virðingarleysi gagnvart peningum og öðrum verðmætum og þegar myndarlegt einbýli á nesinu var rifið einungis til að byggja nýtt. En maður ætti svo sem ekki að vera dæma aðra, ætli maður misti ekki virðinguna líka ef maður ætti sand af seðlum.

[Ester Sveinbjarnardóttir, 13.4.2007 kl. 00:35]

Viss hroki í því að eyða peningunum í svona þegar helmingur mannkyns sveltur.

[Sigurður G. Tómasson, 13.4.2007 kl. 17:40]

Þetta er reyndar ótrúleg myndasyrpa af rússneskum vegi! En kannski er ekki allt sem sýnist. Sumir rússneskir vegir, tam. í Síberíu, eru lagðir á sífrera. Á seinni árum hafa svo aumingja Rússarnir lent í því að sífrerinn þiðnar miklu meira en á fyrri árum. Fleiri hafa lent í vandræðum út af þessu. Til dæmis er mér sagt, að hægt sé að finna Inúítaþorp í Alaska, þar sem húsin standa næstum upp á endann. En ég hef ekki séð myndir af því. Sumir vegir á túndrunni hafa víst alltaf verið svona að sumarlagi,  eins og myndirnar hans Eysteins sýna. Þeir voru nú heldur ekki burðugir ávorin hér áður, þeir íslensku!

[Karl Tómasson, 14.4.2007 kl. 23:11]

Ég hefði frekað kosið að fá Elton John og Fimmtíu sent í öll afmælin mín sem ég á vonandi eftir að halda. Jafnvel átt smá afgang eftir.

Kær kveðja frá Kalla Tomm.