Komin aftur

    Hef veitt sæmilega síðustu daga. Bleikjan er komin aftur eftir tæplega tveggja vikna fjarvist af grunnslóð. Kunningi minn sagði mér að lokustjórar Landsvirkjunar við útfallið hefðu enn einu sinni sturtað niður og næmi vatnsborðslækkunin tíu sentimetrum á afar stuttum tíma. Ég hef ekki getað staðreynt þetta en efast ekki um að þetta sé satt, í ljósi fyrri reynslu.

    En þetta er svo sem ekkert nýtt. Landsvirkjunarmenn virðast ekki geta lært þær einföldu staðreyndir að svona fikt í rennslinu, með tilheyrandi snöggri vatnsborðslækkun virkar eins og Þingvallavatn hafi orðið fyrir víðtækri sprengjuárás. Allt lífríkið verður fyrir áfalli. Mýklak skemmist, vatnabobbi drepst og bleikjan hverfur út á djúpið.

    Fyrir þessu er áratugareynsla heimamanna sem best þekkja vatnið. Og alkunnug er sú líffræðilega staðreynd að virkni lífríkisins er mest í efstu sentimetrum vatnsins. Baráttan við lokustjóra Landsvirkjunar hefur staðið í áratugi, eða síðan þeir settust við kranana á virkjununum við Sogið. Upphaflega báru þeir hinum ótrúlegustu firrum við.

    Þeir þrættu fyrir að vatnsborðið hefði hækkað við stíflugerð í útfallinu, þótt það lægi fyrir skjalfest. Þeir héldu því fram að vatnsborðsbreytingar hefðu engin áhrif á lífríkið. Þeir héldu því fram að vatnsborðsbreytingar væru minni eftir virkjun en fyrir og minntust þá ekkert á það að áður voru vatnsborðsbreytingar sneggstar í kerlingarhlákum á veturna þegar áhrifin eru sáralítil á lífríkið.

    Loks féllst Landsvirkjun á að takmarka snöggar vatnsborðsbreytingar við 20 sentimetra og hefur haldið það samkomulag sæmilega. En að margra mati er þetta allt of mikil breyting og reyndar með öllu óþörf.

    Við sem unnum náttúru Þingvallavatns erum búin til þess að láta liggja í láginni fyrri glæpi, eins og þegar merkilegasta urriðastofni Evrópu var útrýmt til þess að byggja smávirkjun og bitmýinu í Soginu var útrýmt með eitri. Þá vissu menn  kannski ekki hvað þeir voru að gera. Nú eiga menn að vita betur. Látið þið Þingvallavatn í friði, lokustjórar. Þið hafið gert nægar skammir af ykkur á liðnum árum.

     

Athugasemdir

[Pjetur Þ. Maack (IP-tala skráð) 5.7.2006 kl. 15:22]

'akaflega sammála vini mínum og félaga Sigurði. Allir, sem fylgjast náið með sjá hve gífurleg áhrif þetta hefur á lífríkið allt til hins verra.
Alls konar skýringar hef ég heyrt þá ég spyr, háa sem lága hjá virkjun landsins. Allt frá þí að menn þræta með látum þó maður horfi á 20 cm gróðurslikju baða sig í sól eingöngu og segja að ekkert hafi verið gert, eða þá að eitt sinn var tunglinu kennt um í mín eyru.
Spurningarnar eru bara tvær, einfaldar og skýrar;
1. HVER tekur ákvörðun um að breyta hæðinni á vatnsyfirborðinu?
2. Í HVAÐA tilgangi er það gert ?
Ég, og fleiri, erum búnir að bíða lengi eftir svari, ég frá 1988 er ég spurði fyrst.
Pjetur Þ. Maack

[Steinn E. Sigurðarson, 5.7.2006 kl. 17:19]

Ja, það er því miður ýmislegt að gerast hér á landi sem bendir til þess að menn viti ekki mikið betur í dag en þá.

[Gunnar Egilsson (IP-tala skráð) 7.7.2006 kl. 11:14]

Heill og sæll
Þakka þér fyrir að halda opinni umræðu um lífríki Þingvallavatns og Sogs
Ekki virðist veita af að hamra á LV vegna þessa og er reyndar ótrúleg sú tregða þeirra að halda sífellt áfram að fikta með vatnshæðina þrátt fyrir að vitneskja sé um að þetta fikt þeirra valddi stórfelldu tjóni á lífríki vatnasvæðisins
ps:
sendi einnig slóð á síðu Orkustofnunar/vatnamælinga
þar sem vel er hægt að fylgjast með sveiflum

http://vmkerfi.os.is/vatn/VV_Frame.php?r=24647

[Sigurður G. Tómasson, 9.7.2006 kl. 22:14]

Samkvæmt vatnshæðarmælinum við Skálabrekku, hefur vatnsborð lækkað um 10 sentimetra á fjórum dögum. Enda er rennsli Sogsins við Ásgarð um 133 rúmmetrar á sekúndu. Það var, áður en byrjað var að sturta niður, milli 90 og 100. Maður getur ekki annað en spurt. Til hvers er þetta gert?

Gekk reyndar með starfsmönnum Landsvirkjunar um Þjóðgarðinn í dag og veitti þeim eins góða leiðsögn og mér var unnt. En ekki fékk ég neinn botn í þessar vatnsborðssveiflur.